Na-flatten na sang Pilipinas ang curve sang Coronavirus Disease 2019 (COVID-19).
Ini ang pahayag sang University of the Philippines (UP)-OCTA Research team.
Suno kay Professor Guido David, UP-OCTA Research team expert, ginalauman na nga daan sang research team nga ma flatten ang curve sa bulan sang Setyembre.
Pahayag niya, ang reproduction number sang pungsod sa diin ini ang nagatumod sa numero sang tawo nga mahimo malatnan sang isa ka COVID-19 patient ang nagnubo sa 0.94 kag nagapadayon pa ini nga maganubo.
Apang yara sa gihapon sa kritikal nga lebel ang pila ka mga local government units sa Metro Manila kun COVID-19 bed occupancy ang pagahambalan.
Sa pihak sini, nagpaandam man ang UP expert sa publiko nga indi mangin excited sa pag-flatten sang curve bangud mahimo nga maglain na naman ang dalagan sang sitwasyon sang pungsod sa mga masunod nga inadlaw.
