ILOILO CITY – Nagdepensa ang pamunu-an sang Western Visayas Medical Center kasunod sang pagkwestyon sang pamilya kun nga-a kinahanglan gid nga i-cremate ang bata nga ginbawi-an sang kabuhi matapos nabunggu-an sang salakyan sa Jaro, Iloilo City kag gindala sa nasambit nga hospital.
Sa interview sang Bombo Radyo kay Richard Saltin, designated spokesperson kag Disaster Risk Reduction and Management in Health Manager sa nasambit nga hospital, iya ginpahayag nga may yara sang exposure sa COVID-19 patients ang siyam ka tuig nga bata.
Suno kay Saltin, ang non-COVID-19 Emergency Room ang ginagamit sa subong sang mga pasyente nga nalatnan sang virus.
Ginpahayag ni Saltin nga gindala sa nasambit nga Emergency Room ang siyam ka tuig nga bata bangud nga didto napahamtang ang mga equipment kag didto man naga-duty ang mga doktor.
Sa subong suno kay Saltin, naglab-ot sa 29 ang backlogs kun COVID-19 patients ang pagahambalan rason nga may triage nga ginapatigayon sa pagbaton sang pasyente.
Matandaan nga ginkwestyon sang pamilya kun nga-a ginakabig nga suspected COVID-19 patient kag kinahanglan nga i-cremate ang bangkay sang bata apisar nga indi man COVID-19 ang iya ginkamatay.
