ILOILO CITY – Padayon ang pagpanakop sang compliance team sang Iloilo City Government may kaangtanan sa ginapatuman nga minimum health standards bilang pangaman sa COVID-19.
Sa interview sang Bombo Radyo kay Rudiver Jungco Sr., pinuno sang Sports and Development Office, iya ginpahayag nga ang ila team nga ginabug-usan sang Green Guards, Task Force on Moral and Values Formation, Business Permits and Licensing Office kag sang Iloilo City Anti-Smoking Task Force ang na-assign sa distrito sang La Paz, Lapuz kag Jaro.
Suno kay Jungco, naglab-ot na sa 357 ang nadakpan humalin sang Agosto 18 tubtub Setyembre 7 kun sa diin kalabanan sa mga violator ang gindakop bangud wala nagasuksok sang face mask.
Ginpahayag ni Jungco nga sang ginpasar ang ordinansa may kaangtanan sa mandatory nga pagsuksok sang face mask, duha pa ka bulan ang nakaligad antes ang istrikto nga pagpatuman sini.
Kalabanan sa mga violators ang nakabayad na sang P500 nga multa samtang may iban naman nga nagpromisa sang community service.
Naglab-ot naman sa 612 ang nadakpan sang compliance team nga na-assign sa distrito sang Mandurriao, Molo kag Arevalo.
Sa pagpaathag ni Fernando Jose “Boyet” Rico, Executive Assistant for Barangay Affairs, ang nasambit nga numero ang na record humalin sang Hulyo 1 tubtub Setyembre 6.
Suno kay Rico, sa 612 ka violators, masobra 100 pa lang ang nakabayad sang multa nga P500 samtang ang mga nabilin ang nagpromisa sang community service.
Bilang pinuno sang team, ginpahayag ni Rico nga indi malikawan nga may nagareklamo batok sa ila may kaangtanan sa pagdakop sa mga wala nagasuksok sang face mask apang nagahatag man sila sang konsiderasyon depende sa sitwasyon.
Ginpanindugan ni Rico nga ila lamang nga ginahimo kun ano ang mandu sang alkalde sang syudad sang Iloilo bangud nga para man ini sa kaayuhan kag safety sang tanan.
Magluwas sa pagsuksok sang face mask, kinahanglan man suno sa natungdan nga magsuksok sang face shield kun kinahanglan kag magsunod sa physical distancing.
Ang compliance team nga na-assign sa Mandurriao, Molo kag Arevalo ang ginabug-usan sang Barangay Affairs Office kag sang Boarding House Commission.
