Wala pa sang desisyon ang pamilya kun bala magapasaka ini sang kaso sa magulang nga nagbuno-patay sa iya man lang nga manghod sa Barangay Balabag, Dumangas, Iloilo.
Sa interview sang Bombo Radyo kay PMaj. Joven Arevalo, hepe sang Dumangas Municipal Police Station, iya ginpahayag nga kaso nga homicide ang mahimo ipasaka batuk kay Apolonio Longno, magulang sang biktima nga si Jose Longno.
Suno kay Arevalo, sa ila nga imbestigasyon, nagapungko sa atubang balay ang magulang sang ginpalapitan ini sang iya nga manghod nga may dala nga kutsilyo.
Bun-on kuntani sang manghod nga si Jose ang iya magulang apang nakapangaman ini sa diin nag-agaway sila sang kutsilyo.
Natigayon nga maagaw sang magulang ang kutsilyo kag nabun-an ang iya manghod rason nga ini ang napatay.
Dugang pa sang hepe, posible nga na-munohan sang magulang ang iya manghod bangud gin-prenda sini ang ila nga duta kag ginasugal man lang ang kwarta.
Samtang pahayag naman sang isa sa ila mga utod nga si Josephine Longno Cortel, nabatian niya nga ginahangkat sang iya manghod nga si Jose si Apolonio nga mag inaway apang nagahipos lang ang magulang.
Wala na si Josephine nagguwa sa ila balay bangud nakulbaan ini bangud may dala nga kutsilyo si Jose.
