Mga LSIs nga natalana nga magpauli kuntani kahapon sa Iloilo, kanselado ang byahe bangud sa moratorium sang National-IATF

Anom na ka beses nga gin-cancel ang byahe sang mga locally stranded individuals (LSIs) nga mapauli kuntani sa Iloilo halin sa Metro Manila.

Sa interview sang Bombo Radyo sa isa ka LSI, iya ginpahayag nga kahapon Setyembre 9 kuntani ang schedule sang ila nga byahe nga makapauli sa Iloilo apang wala ini madayon bangud sa Resolution no. 69 nga ginpaguwa sang National Inter-Agency Task Force sa diin nasaad nga ang bug-os nga Western Visayas, Lanao del Sur kag Iligan City ang naghingyo sang moratorium nga suspendido anay ang pagpapauli sa mga Locally Stranded Individuals.

Sa subong nagapabilin sa guwa sang Pier 4 sa Tondo, Manila ang mga locally stranded individuals sa diin karton nga gintapik-tapik lamang ang ila ginagamit nga hiligdaan.

Suno sa LSI, humalin sang Agusto 1 pa nga gina-cancel ang ila byahe papauli sa Iloilo nga sa pagkamatuod, may yara naman sila sang swab test para sa COVID-19 kag negatibo man ang ila resulta.

Dugang sang natungdan, sila mismo nagbayad sang swab test balor P5,000 agud lang kuntani nga makapauli.