Kun sa Japan, may yara sang Hachiko, ang ido nga naghulat sang pila ka tuig sa iya nga amo matapos ini magtaliwan, sa California naman aton kilalahon si Odin.
Sang ginlamon sang kalayo ang balay ni Roland Handel sa California, ang tag-iya nga nagatatap sa ido nga si Odin, kinahanglan niya nga magdesisyon kun bala piliton ang iya hinuptanan nga ido nga pasudlon ini sa salakyan ukon pabay-an na lamang ini bangud sa nagadako nga kalayo sa lugar.
Si Odin amo ang nagabantay sa walo ka mga kanding sang pamilya.
Suno kay Handel, sang gab-i nga ginalamon na sang sunog ang ila lugar, indi gid maghalin ang ido sa mga kanding — bisan ano nga pilit kay Odin, nagapakatig-a ini nga maghalin sa lugar sa diin nagpungko pa ini sa atubang sang mga kanding kag wala naga hulag-hulag.
Wala na sang oras ang tag-iya nga salbaron pa ang mga kanding bangud tuman ka delikado gani iya na desisyonan nga maghalin na sa lugar kaupod ang iya 14 anyos nga bata.
Kaupod ni Handel sa pag-evacuate amo ang tatlo pa nila nga ido kag duha ka mga kuring.
Indi man kuntani niya luyag nga ibilin si Odin kag walo ka mga kanding apang wala siya sang may mahimo bangud mahimo man nga mabutang sa peligro ang ila kaugalingon sang iya anak.
Apisar sini, tuman ang pagpangamuyo sang tag-iya kag nagalaom nga yara lang sa maayo nga sitwasyon si Odin kag mga kanding.
Isa ka adlaw ang nagligad kag nagbalik si Handel sa ila nga lugar, nakit-an niya nga sunog na ang iya balay magluwas lang sa nagahulat sa iya.
Naglumaw-lumaw ang mata ni Handel bangud sa iya nakit-an.
Buhi ang iya ido nga si Odin kag kumpleto man ang walo ka mga kanding.
Daw indi makapati si Handel sa iya nakita gani tuman na lang ang kasadya nga iya nabatyagan.
Gindalagan niya ang iya ido, ginkup-an kag gin-halukan.
May nakita nga minor nga mga pilas tuga sang kalayo sa lawas ni Odin.
Pahayag ni Handel, apisar nadula kag nasunog ang iya balay, wala siya sang iban nga nabatyagan kundi lunsay kalipay kag pagpasalamatan sa Diyos.
Sa subong, naka-recover na si Odin kag nagbalik man ang iya nga kapagsik.
