ILOILO CITY – May yara sang pagsaka sa multa para sa mga violator sang ginapatuman nga minimum health standards sa syudad sang Iloilo.
Ini matapos nga gina-probahan sang konseho sang Setyembre 8, ang pag-amyendar sang The Face Mask Ordinance kun sa diin mangin mandatory naman ang pagsuksok sang face shield ukon eye protector sa mga pampubliko nga lugar kag mas ginpataasan ang silot nga igahatag sa tagsa ka violation.
Sa interview sang Bombo Radyo kay Rudiver Jungco Sr., pinuno sang Sports and Development Office kag isa man sa nagabug-os sa compliance team, iya ginpahayag nga sa first offense, magalab-ot na sa P1,000 ang multa sa baylo nga P500 kag may yara man sang 8 ka oras nga community service sa sulod sang tatlo ka adlaw.
Suno kay Jungco, sa ika-duha nga offense, P3,000 ang multa kag community servce samtang sa 3rd offense, P5,000 ang multa kag may community service.
Ginpahayag ni Jungco nga wala nagapadaso-daso sa pagdakop ang compliance team agud lamang nga may yara sang accomplishment bangud nga may mga sitwasyon man nga kinahanglan kuhaon ang face mask kag face shield ilabi na kun naga-kaon ukon naga-inom sang kape.
Ang pagsunod sa ginapatuman nga minimum health standards suno sa natungdan ang kun tani mangin social responsibility sang tagsa-tagsa apisar nga wala sang compliance team nga nagabantay.
Kun nagabuligay ang tanan suno sa natungdan, mapahagan-hagan ang local transmission sang COVID-19.
Nahibalu-an nga mangin epektibo ang gin-amyemdaran nga ordinansa 15 ka adlaw matapos ang publication sini.
