Masubo nga balita para sa mga flower vendor ang pahayag ni Mayor Jerry Treñas nga siraduhon ang tanan nga patyo sa syudad sang Iloilo kadungan sang pagdumdom sang tigkalalag.
Sa interview sang Bombo Radyo kay Jebong Miag-ao, manugbaligya sang bulak sa Iloilo Central Market, iya ginpahayag nga daku nga kadulaan para sa ila kun ipsirado ang mga patyo umpisa Oktubre 30 tubtub Nobyembre 2.
Suno kay Miag-ao, tuman ka pigado sang baligyaanay sa subong bangud nga may yara sang pandemya kag indi man sila mahimo nga makapamahal sang presyo sang bulak para sa ila mga suki.
Ginpahayag ni Miag-ao nga sa tagsa ka tigkalalag man lang sila makaginansya sang daku apang kun may yara sang mandu ang alkalde, wala sila sang may mahimo kundi sundon ini kag magpadayon na lang sa pagnegosyo.
Nahibalu-an nga ang pagpasirado sang mga patyo sa nasambit nga inadlaw ang kabahin sang lihok sang gobyerno agud nga malimitahan ang local transmission sang COVID-19.
