ILOILO CITY – Ginalauman nga duha tubtub tatlo ka adlaw na lang ang turn-around time sa pagpaguwa sang COVID-19 test results sang Western Visayas Medical Center Sub-National Laboratory.
Sa interview sang Bombo Radyo kay Dr. Stephanie Abello, chief pathologist sa nasambit nga Sub-National Laboratory, iya ginpahayag nga sa subong, magalab-ot lamang sa 1,500 ang maximum specimen nga ila pagabatunon.
Ang sobra nga specimen suno kay Abello ang igabalik sa Regional Epidemiology Surveillance Unit nga amo naman ang in-charge sa pagpangita sang bakante nga laboratoryo.
Ginpahayag ni Abello nga sang nakaligad nga binulan, nangin atrasado ang pagpaguwa sang COVID-19 test results bangud nga sobra sa maximum capacity ang ginabaton kag ang mga medical staff ang nagakaapektuhan.
