ILOILO CITY – Tatlo ka mga importante nga agenda ang gin-istoryahan sa ginpatawag nga consultative meeting nga ginpangunahan ni Iloilo City Councilor Alan Zaldivar may kaangtanan sa sitwasyon sang mga hospital kun COVID-19 ang pagahambalan.
Sa ginpatigayon nga virtual meeting, yara ang mga tiglawas sang public kag private hospital lakip na sang line-in clinics kun sa diin ginpasikto sila ni Zaldivar tuhoy sa reklamo nga ginapalab-ot sang mga pasyente.
Sa interview sang Bombo Radyo kay Zaldivar nga chairman sang Committee on Health sa Iloilo City Council, iya ginpahayag nga lakip sa mga gin-istoryahan amo ang reklamo sang mga iloy nga ginabalibaran nga magbata sa hospital ukon clinic, pag-cremate sa mga suspected COVID-19 patients kag ang kakulang sang hospital beds.
Suno kay Zaldivar, ginpanginwala sang mga hospital kag clinic representatives nga may yara sila sang ginabalibaran nga OB patients kag santo sa ila pagpaathag, kun kaisa, kulang ang available room ilabi na kun cesarean ang pagbata sang pasyente kun sa diin kinahanglan nga separado ang kwarto sang iloy kag sang lapsag.
Magluwas diri, gin-istoryahan man ang tuhoy sa cremation sang nagtaliwan nga suspected COVID-19 patient kun sa diin santo sa pagpaathag sang mga hospital representatives, may yara anay sang kunsultasyon sa pamilya sang pasyente.
Duha ka option ang ginahatag nga ginalakipan sang cremation kag embalming apang santo sa guidelines sang Department of Health, 12 oras lamang nga makatinir ang bangkay kag nagakadapat ini nga isulod sa selyado nga cadaver body bag kag lungon samtang kun cremation naman, may yara sang COVID-19 team nga dapat magkumpirma nga COVID-19 ang ginkamatay sang pasyente.
May kaangtanan sa kakulang sang hospital beds sa syudad sang Iloilo, ginpahayag sang Konsehal nga iya ginduso nga dapat dugangan sang 5-7% ang capacity sang tagsa ka hospital agud nga makabaton sang dugang nga pasyente.
