ILOILO CITY – Lima ka mga Local Government Unit sa Western Visayas ang nagpasa sang written manifestation tuhoy sa pagbaton sang mga Locally Stranded Individual.
Santo sa record sang Regional Task Force on COVID-19, lakip sa mga nagpabutyag sang kahandaan amo ang Antique, Iloilo Province, Negros Occidental, Iloilo City kag Guimaras.
Sa interview sang Bombo Radyo kay Ma. Aletha Nogra, pinuno sang Office of Civil Defense-Western Visayas Disaster Risk Reduction Management Division kag spokesperson sang Regional Task Force on COVID-19, iya ginpahayag nga ang written manifestation sang nasambit nga mga Local Government Unit ang napasa na kay Sec. Carlito Galvez Jr., ang Chief Implementer sang National Task Force on COVID-19.
Suno kay Nogra, ginpromisa naman ni Sec. Galvez nga iya aktuhan sa labing madali nga tion ang concerns sang tagsa ka Local Government Unit ilabi na kun ang tuhoy sa pagpauli sang mga Locally Stranded Individual.
May kaangtanan sa mga Locally Stranded Individual nga naalangan sa pantalan sa Metro Manila bangud sa ginpaguwa nga moratorium, ginpahayag ni Nogra nga ila pa ini nga gina-verify apang ang Department of the Interior and Local Government – National Capital Region amo ang in-charge sa paghatag sang bulig.
Kun tuhoy naman sa ginapahayag batch sang Locally Stranded Individual nga magapauali kun tani sa Aklan apang nakahalin na ang ila ginasakyan nga barko sa Batangas Port sang nagguwa ang moratorium, ginpahayag sang natungdan nga iya pa nga hibaluon paagi sa Emergency Operation Center ang tuhoy diri.
Nahibalu-an nga ang Roxas City kag Bacolod City lang sa Western Visayas ang naghingyo sang moratorium samtang ang Aklan naman ang magasunod na lang sa resolution no. 69 sang Inter-Agency Task Force kun sa diin nakasaad nga ang bug-os nga Western Visayas ang sakop sang pagsuspende sang pagbaton sang Locally Stranded Individual.
