ANTIQUE – Indi pa matumod sang San Jose De Buenavista Muncipal Police Station ang motibo sa pagluthang patay kag paglubong sa 48 anyos nga lalaki sa Barangay Funda, Dalipe, San Jose De Buenavista, Antique.
Sa interview sang Bombo Radyo kay PMaj. Benjo Clarite, hepe sang San Jose De Buenavista Muncipal Police Station, iya ginpahayag nga ang biktima amo si Jerry Bolivar kag naga-istar sa Barangay Bakhaw, Mandurriao, Iloilo City apang tumandok sang Leganes, Iloilo.
Suno kay Clarite, 12 ka tuig nga na-preso si Bolivar bangud sa kaso sa iligal nga droga kag sang Disyembre 2019 lang ini natigayon nga makaguwa.
Dugang pa sang hepe, tubtob subong wala pa sang identity ang mga kapulisan sa suspek nga nagpatay sa biktima.
Nahibaluan nga nakit-an lamang si Bolivar nga wala na sang kabuhi sa kinutkutan nga duta sa nasambit nga barangay sa diin may yara ini sang pilas sa ulo kag lawas tuga sang pagtiro kag pilas sa idalom sang guya nga mahimo tuga sang pagbuno.
