Indi pa mapat-od sang Tigbauan Municipal Police Station kun bala myembro sang Revolutionary Proletariat Army-Alex Boncayao Brigade (RPA-ABB) ang barangay tanod nga nagluthang-patay sa isa ka mangunguma sa Sitio Bantayan, Brgy. Buyuan, Tigbauan, Iloilo.
Ang biktima amo si Pedro Celestial, 35, samtang ang suspek amo si Barangay Tanod Anthony John Tajano, lunsay residente sang nasambit nga lugar.
Sa interview sang Bombo Radyo kay PMaj. Rolando Araño, hepe sang Tigbuan Municipal Police Station, iya ginpahayag nga may mga impormasyon sila nga nabaton nga katapo sang nasambit nga grupo ang suspek apang ini ang indi pa makumpirma sang kapulisan.
Suno kay Araño, liwat nila nga ginbalikan ang lugar sang krimen kag na-recover ang mga empty shells kag ginpahayag indi magnubo sa apat ka lupok ang nabatian sang mga pumuluyo.
Sa subong, wala sa gihapon makit-an si Tajano matapos ini malagyo sa ginhimo nga krimen.
