ILOILO – Gintawag ni anay Department of Health Sec. kag subong Iloilo 1st district Congresswoman Janette Garin nga “same old recycled case” ang warrant of arrest nga gindagdag batok sa iya kaupod ang 20 ka iban pa bangud sa Dengvaxia controversy.
Ini matapos nga nagguwa ang warrant of arrest batok kay Garin kag sa 20 ka iban pa nga pirmado ni Edith Cynthia Wee-Cabbat, presiding judge sang Municipal Circuit Trial Court sang San Luis, Baler, Aurora nga napetsahan sang March 2, 2020.
Santo sa nasambit nga desisyon, sanday Garin kag 20 ka iban pa ang naulamid sa Reckless Imprudence Resulting to Homicide kun sa diin P30,000 ang bail bond ukon pyansa sang kada isa sa ila.
Sa exclusive interview sang Bombo Radyo kay Garin, iya ginpahayag nga ang nasambit nga desisyon ang sakop sang ika-duha nga batch sang kaso nga ginpasaka sang Public Attorney’s Office sa pagpamuno ni Atty. Persida Acosta.
Suno kay Garin, sa iya pagkahibalo, apat ka batch ang kaso nga ginpasaka sa ila apang ang una nga batch ang lunsay dimissed na.
Ginpahayag ni Garin nga ang nasambit nga desisyon ang ginpaguwa sang Marso kag sa pagkamatuod, nakabayad na siya sang pyansa sa ginakaulamiran nga criminal case.
Ginkawestyon lang sang anay DOH Secretary kun ngaa subong lang ginpaguwa ang nasambit nga warrant of arrest kag kasubong nga smoke screen lamang ini sa matuod nga nagakatabo sa pungsod.
