ILOILO CITY – Nagpaathag ang Department of Health Region 6 may kaangtanan sa proseso sang pagpaguwa sang resulta sang RT-PCR test kasunod sang reklamo tuhoy sa tuman ka atrasado nga pagpaguwa sang test results.
Sa interview sang Bombo Radyo kay Dr. Marie Jocelyn Te, COVID-19 spokesperson sang Department of Health Region 6, iya ginpahayag nga may yara sang mga hospital nga naga-require sa mga pasyente ilabi na sa mga iloy nga manugbata sang negative nga RT-PCR test results apang indi naman ini required santo sa guidelines sang ahensya.
Suno kay Te, pagkatapos nga maproseso sang laboratoryo ang specimen, ang resulta ang ginapasa sa tagsa ka Local Government Unit nga amo naman ang magapahibalo sini sa pasyente.
Ginpahayag ni Te nga ginapadal-an man sang kopya ang Regional Epidemiology Surveillance Unit.
Para sa mga nagpakuha sang swab sample nga wala pa nakabaton sang resulta tubtub subong, mas makapaayo suno sa natungdan nga magpakig-angot sa laboratoryo nga amo ang nagproseso sang specimen agud mahibalu-an ang status kag ang resulta.
May kaangtanan naman sa reklamo batok sa City Health Office tuhoy sa indi pagpahibalo sang RT-PCR test results sang isa ka empleyado, ginpahayag ni Te nga indi siya makatugda tuhoy diri.
Mas makapaayo suno kay Te kun ang Local Government Unit ukon ang City Health Office mismo ang makasabat kun nga-a wala napahibalo ang tagreklamo.
Sa pagpaathag ni Te, ang iya lamang nga mapasalig amo nga ginapasa gilayon sang laboratoryo sa tagsa ka Local Government Unit ang resulta sang RT-PCR test sa tion nga matapos ang pagproseso sang specimen.
