ILOILO CITY – Mahimo nga indi pamilyar ang duha ka mga suspek nga nagtuyo sa pag-carnap sa truck nga ginapanag-iyahan ni Punong Barangay Woody Dela Riarte rason nga nahulog ang salakyan sa gabok nga taytay sa Brgy. Bakhaw, Mandurriao, Iloilo City.
Sa interview sang Bombo Radyo kay Punong Barangay Dela Riarte sang Kauswagan, Iloilo City apang naga-istar man sa Brgy. Bakhaw, Mandurriao, iya ginpahayag nga nakita sa kuha sang Closed Circuit Television Camera nga duha ka wala makilala nga suspek ang nagtuyo sa pag-carnap sa iya truck nga may karga nga utan kag iban pa nga kararuton.
Suno kay Dela Riarte, narumpag ang taytay sang gin-agyan sang truck bangud nga ini ang gina-agyan lamang sang tawo, tricycle kag mga magagmay nga salakyan.
Ginpahayag ni Dela Riarte nga mahimo nga gintuyo sang mga suspek nga maglusot sa Brgy. San Vicente sa distrito sang Jaro apang naremalaso matapos nga may residente nga nagreklamo bangud sa tuman ka gahod nga rebolusyon sang truck.
Bangud sini, mahimo nga naalang-alang ang truck rason nga narumpag ang taytay kag nagpalagyo sa wala mahibalu-an nga direksyon ang mga suspek.
Sang gin-usisa, ginpahayag sang Punong Barangay nga may nagkaladula na nga mga produkto nga karga sang truck
Magluwas sa gasto sa pag-arkila sang backhoe agud makuha ang truck, ginpahayag sang natungdan nga daku ang iya gastuhon sa pagpakay-o sa naguba nga salakyan kag sa narumpag nga taytay.
