Pirmado na ni Presidente Rodrigo Duterte ang Bayanihan to Recover as One Act nga nagahatag sang COVID-19 relief package balor P165.5 billion.
Ginpirmahan sang Presidente ang panibag-o nga layi, 18 ka adlaw matapos gin-ratipikahan sang Kongreso ang Bayanihan 2 sang Agosto 24.
Suno kay Senate finance committee chairman Sonny Angara, ang P140 billion ang magahalin sa general appropriations samtang ang P25.5 billion ang magaserbe nga standby authority nga mahimo gamiton kun ang dugang nga government revenues ang mangin available.
Ang standby fund ang ginalakipan sang P10 billion para sa COVID-19 testing kag pag-procure sang bulong kag bakuna samtang ang P15.52 billion ang magaserbe bilang dugang nga capital infusion sa mga government banks.
Sa panibag-o nga layi, ang P50 billion ang magakadto sa government financial institutions kaangay sang Land Bank of the Philippines, Development Bank of the Philippines, Philippine Guarantee Corp., kag Small Business Corp. agud nga makahatag sang loan sa mga apektado nga sektor.
Hatagan man sang cash subsidies balor P5,000-P8,000 ang mga low-income households sa mga lugar nga yara sa idalom sang granular lockdown, kag sa mga returned overseas Filipino workers amo man sa mga displaced workers.
Ang Bayanihan 2 ang mangin epektibo tubtob Disyembre 19, 2020.
