PASSI CITY – Yara na sa estable nga kondisyon ang mag-asawa nga negosyante sa Passi City, Iloilo matapos nagpositibo sa Coronavirus Disease 2019 (COVID-19).
Ang mag-asawa ang lunsay naga-edad sang 51 anyos kag nagapabilin sa subong sa hospital.
Sa interview sang Bombo Radyo kay Passi City Mayor Stephen Palmares, iya ginpahayag nga ang mag-asawa ang nakitaan sang sintomas sang COVID-19 rason nga nagpa-admit sila sa hospital kag ginkuhaan sang swab sample para sa COVID-19 test.
Setyembre 8 suno kay Palmares sang ginkuhaan sang swab sample ang mag-asawa kag sila mismo ang naggasto rason nga pagkasunod nga adlaw, nagguwa ang resulta kag nakumpirma nga positibo sila sa virus.
Antes pa man sini, ginpahayag ni Palmares nga nakapadulong pa sa syudad sang Iloilo ang lalaki nga pasyente nga isa ka Overseas Filipino Worker apang pila na ka bulan nga nakapauli sa Passi City.
Bangud nga may yara sang negosyo ang mag-asawa, ginpaidalom sa strict home quarantine kag ginkuhaan sang swab sample ang 12 ka mga empleyado kag ang mga kaupod sa balay sang duha ka pasyente.
Sa 40 ka COVID-19 positive nga na record sa nasambit nga component city, 32 ang naka-recover, 6 ang naka-facility quarantine kag 2 ang yara sa hospital.
