Maga-umpisa na bwasnga adlaw, Setyembre 14 ang Department of the Interior and Local Government sa pag-hire kag pag-train sang indi magnubo sa 50,000 nga mga contact tracers sa bilog nga Pilipinas kasunod sang pagpirma ni Presidente Rodrigo Duterte sang “Bayanihan to Recover as One Act” ukon Bayanihan 2 Law.
Suno kay Department of the Interior and Local Government Sec. Eduardo Año, ang nasambit nga layi ang magapasangkad sang contact tracing program sang pungsod sa diin ang 50,000 contact tracers ang mangin ‘game changer’ sa COVID-19 response sang Pilipinas.
Liwat nga ginpasalamatan ni Año ang Presidente kag ang Kongreso sa pag-hatag sang nagakaigo nga pondo para sa COVID-19 response.
Dugang pa sang natungdan, ang ginapangita sang ahensya amo ang mga dedikado kag may pagpalangga sa pungsod nga luyag man nga mag-upod sa pagpakig-away batuk sa COVID-19.
Kun ma hire na, ang 50,000 nga mga contact tracers ang i-assign sa mga Contact Tracing Teams sang Local Government Units.
Ang mga Contact Tracing Teams amo ang composite units sang Municipal ukon City Health Officers kaupod ang mga myembro halin sa Philippine National Police, Bureau of Fire Protection, Barangay Health Emergency Response Teams (BHERTS), kag volunteers gikan sa Civil Society Organizations (CSOs).
Sa subong may yara sang 97,400 contact tracers sa pungsod.
Sa idalom sang guidelines nga ginhimo sang Department of the Interior and Local Government, ang contact tracers ang magabaton sang P18,784 bilang minimum nga sweldo kada bulan pinaagi sa ‘contract of service’ status.
