ILOILO CITY- Ginapadali na ni Senator Risa Hontiveros ang pagpasar sa Magna Carta for Seafarers ukon Marino Bill kasunod sang paglugdang sang Gulf Livestock sa Japan sa diin 36 pa ka mga Pinoy seafarers ang missing.
Sa interview sang Bombo Radyo kay Hontiveros, iya ginpahayag nga madugay na nga ginakinahanglan sang pungsod ang mapag-on nga legal nga proteksyon para sa mga Pinoy seamen nga mahimo magpasiguro sang ila kinamatarung kag interes sa diin man sila nga bahin sang kalibutan.
Suno sa senador, ang pagpasar sa Senate Bill No. 357 nga nagamando sang komprehensibo nga reintegration programs, libre nga legal assistance kag iban nga workplace protections para sa mga Pilipino ang may dako gid nga bulig sa ila.
Ang hagna nagahingyo man sang komprehensibo nga reporma sa legal framework nga naga-regulate sang maritime labor industry agud nga mas maprotihiran ang kaayuhan sang mga seafarers antes, samtang yara, kag pagkatapos sang ila deployment.
Matandaan nga una na nga ginduso ni Hontiveros ang madasig nga pagpasar sini agud nga mabuligan ang mga seafarers nga apektado sang COVID-19.
Santo sa data, indi magnubo sa 49,000 ka Pinoy seafarers ang nadulaan sang trabaho kag napilitan nga magpauli sa Pilipinas bangud sa pandemya.
