ILOILO CITY – Yara sa quarantine facility kag nagapabilin nga asymptomatic si Punong Barangay Efren Gimeo sang Jalandoni Estate, Lapuz, Iloilo City matapos nagpositibo sa Coronavirus Disease 2019 (COVID-19).
Sa interview sang Bombo Radyo kay Gimeo, iya ginpahayag nga sang Setyembre 12 lang nagguwa ang resulta sang iya nga COVID-19 test matapos nagpakuha sang swab sample sang Setyembre 8.
Suno kay Gimeo, padayon sa subong ang contact tracing kun sa diin matapos ang iya nga pagpakuha sang swab sample, may pila pa ka mga aktibidad siya nga gintambungan.
Ginpahayag ni Gimeo nga sakop man sa contact tracing ang mga aktibidad nga iya gintambungan, isa ka semana antes nagpakuha sang swab sample.
Nahibalu-an nga nangin mandatory ang pagpaidalom sa COVID-19 test sang mga punong barangay sa syudad sang Iloilo matapos nga ginmandu ni Mayor Jerry Treñas.
Ang nasambit nga lihok sang alkalde ang kasunod sang pagpositibo sa COVID-19 sang pila ka mga punong barangay.
