ILOILO CITY – Magapabilin ang 1 meter nga physical distance sang mga pasahero nga magasakay sa pampubliko nga salakyan sa syudad sang Iloilo.
Ini ang kasunod sang mandu sang Department of Transportation nga epektibo Setyembre 14, mangin 0.75 meter na lang ang physical distance kag ini ang panubu-an sa 0.50 meter sa Setyembre 28 kag 0.30 meter naman sa Oktubre 12.
Sa interview sang Bombo Radyo kay Public Safety and Transportation Management Office head Jeck Conlu, iya ginpahayag nga status quo ang pagpatuman sang 1 meter nga physical distancing sa bug-os nga syudad.
Bangud sini suno kay Conlu nga nagaserbe man nga focal person for COVID-19, wala sang pagpangsita ukon pagpangdakop nga matabo sa mga driver nga indi pa makapatuman sang 0.75 meter nga mandu sang Department of Transportation.
Ginpahayag ni Conlu nga wala pa sang may nabaton si Iloilo City Mayor Jerry Treñas nga kopya sang memorandum tuhoy sa reduce physical distancing.
