Gin-paboran ni Presidente Rodrigo Duterte ang ginaduso ni Senate President Vicente Sotto III nga ibutang bilang “chief of the board” sang Philippine Health Insurance Corporation si Department of Finance Secretary Carlos Dominguez III.
Nakigkita ang Presidente kay Sotto kag House Speaker Alan Peter Cayetano sa diin gin-istoryahan ang mga ginaduso nga layi nga nagatumod sa pagsolbar sang kurapsyon kag red tape ukon excessive bureaucracy.
Ang mga kontrobersiya nga ginakaulamiran sang PhilHealth ang gin-diskusyonan man sa pagsinapol.
Kun matigayon ang ginaduso ni Sotto, si Dominguez ang magabulos sa chairmanship sa PhilHealth board tal-os kay Department of Health Secretary Francisco Duque III nga ginpakamalaot bangud ginapahayag may kaangtanan man ini sa anomaliya nga nagakatabo sa nasambit nga state health insurer.
Sang damlag lang, gin-aprubahan sang Presidente ang rekomendasyon sang multi-agency task force nga iya gintukod nga pasakaan sang kaso ang pila ka mga executives sang PhilHealth lakip na ang anay presidente nga si Ricardo Morales.
