Indi makabaton sang pension sa masunod nga tuig ang 91,000 nga mga senior citizen sa pungsod matapos nga ginbuhinan sang Department of Budget and Management (DBM) ang pondo sang Department of Social Welfare and Development (DSWD) para sa Social Pension program.
Sa ginpatigayon nga deliberasyon sang House Committee on Appropriation, ginpahayag ni DSWD Assistant Secretary Glenda Relova nga may wait listed nga mga senior citizens nga nagahulat nga mahatagan sang pension kag indi ini nila mahatag kun kulang ang pondo sang ahensya.
Una na nga nabalaka sanday Bayan Muna partylist Rep. Carlos Isagani Zarate kag ACT Teachers partylist Rep. France Castro bangud ginbuhinan sang P816.065 million ang pondo sang nasambit nga programa.
Nahibaluan nga ang orihinal nga pondo nga ginduso para sa Social Pension program ang nagabalor P24.003 billion apang ang gin-aprubahan lang sang Department of Budget and Management ang yara sa P23.187 billion.
