Nakahibalo ka bala nga ang masami nga pagka-positibo sang tawo ang indi man maayo?
Apisar nga importante nga may yara ikaw sang positibo nga panan-awan sa kabuhi, wala man sang sala kun pahanugutan mo ang kaugalingon nga makabatyag man sang negatibo nga emosyon — kaangay na lang sang kasubo kag kakulba.
Suno kay Jerome Go, isa ka psychiatrist, “Toxic positivity” ang tawag sa konsepto kun sa diin masami positibo nga emosyon na lamang ang nagakabatyagan sang isa ka tawo kag nagalab-ot na sa punto nga ginapabay-an na ang mga negatibo nga emosyon nga dapat man mabatyagan kuntani.
Lakip sa mga positibo nga pamatasan sang tawo nga ginpahayag ni Go amo ang pagka-masinadyahon kag may manami nga panan-awan sa kabuhi.
Ang mga negatibo naman nga emosyon amo ang kasubo, kakulba, kag pagkabalaka sa ano ang mahimo matabo sa mga masunod nga inadlaw.
Gin-halimbawa man ni Go ang isa ka tawo nga may toxic positivity amo ang masami nga nagahambal nga “Look at the positive side” ukon “okay lang ina” sa isa man ka tawo nga nangin biktima sang mga pagpanghangkat sa kabuhi.
Panugyan sang eksperto, kinahanglan man nga i-acknowledge nga may yara sang indi maayo nga natabo sa kabuhi mo ukon kabuhi sang imo ka-kilala.
Pagkatapos sina, tinguha-i nga i-motivate ang imo ka kilala agud nga mangin positibo ang indi maayo nga inagyan niya sa kabuhi.
