Indi pa mapat-od sang isa ka locally stranded individual kun san-o sila makapauli sa Iloilo samtang nagapabilin subong sa North Harbor Pier 4 sa Tondo, Manila.
Sa interview sang Bombo Radyo kay Joven Espina, iya ginpahayag nga ika-siyam na nga adlaw subong ang ila pagtinir sa Pier 4 kaupod ang iya asawa kag 10-month old nga lapsag.
Suno kay Espina, amat-amat na nga gina-validate ang mga ticket sang mga locally stranded individuals kag nagalaom ini nga makapauli na subong nga semana.
Pahayag niya, tuman ka budlay ang ila sitwasyon sa Pier 4 bangud madamo sang lamok kag kun mag-ulan nagabaha pa.
Dugang pa sang natungdan, makapila naman siya ka beses nagbakal sang karton nga amo ang nagaserbe nga higdaan nila sang iya pamilya.
