Nagapanawagan ang iloy sang Overseas Filipino Worker (OFW) kay Presidente Rodrigo Duterte, sa Overseas Workers Welfare Administration (OWWA) kag sa Embahada sang Pilipinas nga buligan siya nga mahibaluan ang kahimtangan sang iya anak nga yara sa Saudi Arabia matapos nga ginsakit ini sang iya employers.
Ang Overseas Filipino Worker amo si Jenny Rose Salazar Paclijan, 24 anyos kag tumandok sang Ilongbukid, San Rafael, Iloilo.
Sa interview sang Bombo Radyo kay Janet Salazar Paclijan, iloy sang OFW, iya ginpahayag nga ulihe nga na-contact siya sang iya anak sang Setyembre 13 kag ginpakita ang mga pilas sa nagkalain-lain nga bahin sang iya nga lawas nga tuga sang employer niya nga lalaki.
Suno sa iloy, ginpahayag sang iya anak nga naga-inaway ang iya employers nga mag-asawa sang siya ang ginpagwa sang lalaki sa kasilyas bangud nagapanglimpyo ini.
Ginpaatubang sang lalaki ang iya anak sa asawa sini kag ginbakol sang indi lang niya mahibaluan kun ano nga butang ang gingamit bangud napilas gid ang likod kag butkon ni Jenny Rose.
Nagdalagan palagyo ang iya anak sa roof top kag ginsirado agud nga indi makasulod ang iya nga amo apang nagtawag ini sang pulis bangud may yara ini sang utod nga pulis.
Ginapahayag nga gindala sang mga kapulisan ang iya anak sa ospital bangud naka send pa ini sang hospital bill sa pakaisa sang iya iloy nga yara man sa Saudi Arabia.
Ang ginakatingalahan lang subong sang iloy kun ngaa tubtob subong wala sa gihapon naka contact ang iya anak.
Tuman nga kakulba kag pagkabalaka ang nabatyagan sang iloy kag nagahingyo ini sa mga ahensya sang gobyerno nga kun mahimo malab-ot ang iya anak kag makapauli sa Iloilo.
Nahibaluan nga indi lamang ini isa ka bes nga ginsakit si Jenny Rose sang iya employers santu sa panaysayon sang iya nga iloy.
