ILOILO CITY – Nakuhaan na sang swab sample ang identified close contacts sang pila ka empleyado sa City Treasurer’s Office sa Iloilo City Hall nga nagpositibo sa COVID-19 sang damlag lang.
Sa interview sang Bombo Radyo kay Mayor Jerry Treñas, iya ginpahayag nga tanan nga empleyado nga na-assign sa City Treasurer’s Office ang ginpaidalom sa COVID-19 test.
Suno kay Treñas, sa subong, ginahibalo na kun bala may yara pa sang close contacts nga wala pa nakuhaan sang swab sample agud nga mapaidalom gilayon sa quarantine.
Bangud sini, nadesisyunan suno kay Treñas nga ipasirado anay ang City Treasurer’s Office subong nga hapon para sa disinfection.
Matandaan nga sang Setyembre 15, ginkumpirma sang alkalde nga may 3 tubtub 4 ka empleyado sang City Treaurer’s Office nga nagpositibo sa COVID-19 kag ginpasirado gilayon ang ground floor sang Iloilo City Hall para sa disinfection.
Sa pangkabug-usan, naglab-ot na sa 7 ka empleyado ang nagpositibo sa COVID-19.
