ILOILO CITY – Nagapangabay si Iloilo City Mayor Jerry Treñas sa Inter-Agency Task Force nga i-konsulta anay sa tagsa ka Local Government Unit antes magpatuman sang dugang nga precautionary measure batok sa COVID-19.
Ini ang reaksyon sang alkalde may kaangtanan sa ginaduso sang Department of Transportation nga 0.75 meter nga physical distance sa public transport apang subong lamang nga adlaw, gin-anunsyo ni Presidential Spokesperson Atty. Harry Roque nga magapabilin sa gihapon ang 1-meter physical distance sa pagsakay sa public transport tubtub nga wala pa naka-desisyon si Presidente Rodrigo Duterte.
Sa interview sang Bombo Radyo kay Treñas, iya ginpahayag nga ang Local Chief Executive amo ang lubos nga nakahibalo sang matuod nga sitwasyon sa ila nasakupan nga lugar kun COVID-19 ang pagahambalan.
Suno kay Treñas, wala sang problema sa pagpatuman sang dugang nga precautionary measure apang kun tani, nakahibalo ang mga Local Chief Executive agud nga makahatag man sang suhestyon.
Ginpahayag ni Treñas nga kun maremalaso, ang Local Government Unit man sa gihapon ang basulon kag sa pagkamatuod, diri sa syudad sang Iloilo, 28 ka mga barangay ang ginpaidalom sa surgical lockdown epekto 12:00 kaina sang udto bangud sa na record nga COVID-19 cases.
Kasubong nga wala sang pulos suno sa natungdan ang ginapatuman nga 1-meter physical distance sa mga pampubliko nga lugar nga kun sa pagsakay sa de-pampasahero nga salakyan, 0.75 meter na ang distansya sang tagsa ka pasahero.
