ILOILO CITY – Nagpadala sang sulat sa Inter-Agency Task Force si Iloilo City Mayor Jerry Treñas tuhoy sa pagpa-untat sang flight sang magapauli nga Returning Overseas Filipinos sa syudad sang Iloilo.
Sa interview sang Bombo Radyo kay Treñas, iya ginpahayag nga magluwas sa sulat, iya nga ginpadal-an sang text message sanday Department of National Defense Sec. Delfin Lorenzana kag National Task Force on COVID-19 chief implementer Sec. Carlito Galvez Jr. kag nangin positibo naman ang reply sang duha ka matag-as nga opisyal sa pungsod.
Magluwas diri, ginpadal-an man sang alkalde sang sulat ang Regional Inter-Agency Task Force tuhoy sa iya hingyo.
Ang nasambit nga lihok suno kay Treñas ang bangud sa padayon nga nagataas nga COVID-19 cases sa syudad sang Iloilo kun sa diin subong nga adlaw, Setyembre 17, 28 ka mga barangay ang ginpaidalom sa 3-day surgical lockdown.
Ginpahayag sang alkalde nga wala pa siya makahibalo kun san-o ang effectivity sang moratorium nga iya ginhingyo.
