ILOILO CITY – Yara na sa kustodiya sang Regional Personnel Holding and Accounting Unit ang anum ka police trainees nga nadakpan nga nagapahubog sa Sara, Iloilo.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang anum ka babayi nga police trainees ang temporaryo nga naga-duty sa idalom sang Regional Headquarters Support Unit.
Suno kay Malong, may yara sang lima ka adlaw ang anum ka police trainees agud nga makapasa sang affidavit para sa pre-charge investigation kag kun may probable cause, maga-umpisa naman ang summary hearing.
Magadepende naman sa mangin resulta ang pagpasaka sang nagakaigo nga kaso batok sa anum ka police trainees nga una na nga gin-terminate sa Basic Internal Security Operations Course training.
Matandaan nga ang anum ka mga police trainees amo sanday Patrolwoman Jean Tiongco, 25 anyos; Patrolwoman Jeseel Cordivito, 26 anyos; Patrolwoman Ma. Lorena Semilla, 26 anyos; Patrolwoman Rose May Ogboc, 21 anyos; Patrolwoman Shane Grijaldo, 26 anyos kag Patrolwoman Pearl Joy Araneta, 25 anyos nga lunsay tumandok sang Negros Occidental.
