ILOILO – Ginalauman na ni Iloilo Gov. Arthur Defensor Jr. nga tayuyon ang pag-abot sang voyage kun sa diin sakay ang mga Locally Stranded Individuals nga halin sa Metro Manila.
Ini ang kasunod sang report nga may yara sang batch sang mga Locally Stranded Individual nga maga-abot sa Iloilo, buwas nga adlaw, Setyembre 18.
Sa interview sang Bombo Radyo kay Defensor, iya ginpahayag nga kun sundon ang existing executive order, 150 ka LSI halin sa Metro Manila ang pagabatunon sa probinsya sang Iloilo sa kada semana samtang may yara man sang required number sang LSI halin sa Cebu kag iban pa nga bahin sang Mindanao.
Suno kay Defensor, iya na nga ginalauman nga masobra sa 150 ang magapauli bangud nga temporaryo nga ginpauntat ang pagbaton sang Locally Stranded Individual sang damlag lang.
May kaangtanan naman sa pagbaton sang Returing Overseas Filipinos, ginpanindugan sang Gobernador nga mandatory sa gihapon ang pagpaidalom sa 14-day facility quarantine.
Sa pagpaathag ni Defensor, apisar nga ang ginapahanugutan lamang nga makapauli amo ang mga nagnegatibo sa COVID-19 apang may posibilidad sa gihapon nga may magpositibo pag-abot sa Iloilo.
Ginpahayag ni Defensor nga ang mga Returning Overseas Filipinos lang nga nakitaan sang sintomas samtang nagapaidalom sa quarantine amo ang kuhaan sang swab sample para sa COVID-19 test.
Sa tion nga magnegatibo na sa virus, amo na ugaling kag pahanugutan sila nga makapauli.
