ILOILO – Nagahingapos na ang ginapatukod nga molecular biology laboratory sa Pototan, Iloilo.
Sa interview sang Bombo Radyo kay Gov. Arthur Defensor Jr., iya ginpahayag nga sa subong, 85% na nga natapos ang laboratoryo kag ginalauman nga sa masunod nga binulan, maka-umpisa na ini sa pagproseso sang specimen.
Suno kay Defensor, halos kumpleto naman ang equipment magluwas lang sa RT-PCR kag RNA machine kun sa diin ginahulat pa ang supplemental budget sang probinsya.
Magluwas diri, nagapadayon ang training sang mga personnel samtang nagapangita pa sang molecular pathologist nga amo ang kinahanglan agud nga maka-operate ang laboratoryo nga yara sa Iloilo Provincial Hospital.
Nagalaum naman ang Gobernador nga kun mahitso na ang tanan nga kinahanglanon, mahatagan gilayon ini sang accreditation sang Department of Health.
