ILOILO CITY – Paralisado ang paghatag sang serbisyo sang barangay officials sang Jalandoni Estate, Lapuz, Iloilo City.
Ini matapos nga tanan nga barangay officials sang nasambit nga lugar ang naka-quarantine kasunod sang pagpositibo sa COVID-19 ni Punong Barangay Efren Gimeo.
Sa interview sang Bombo Radyo kay Barangay Kagawad Jonathan Lorde, iya ginpahayag nga sang Setyembre 8 sang nagpakuha sang swab sample para sa COVID-19 test si Punong Barangay Gimeo kag sang Setyembre 11 sang nagguwa ang positibo nga resulta.
Antes pa man nagguwa ang positive RT-PCR test restult, ginpahayag ni Lorde nga nakapatigayon pa sang pila ka official function si Punong Barangay Gimeo.
Magluwas diri, ginapahayag nga may pila pa ka aktibidad nga gintambungan ang Punong Barangay kun sa diin madamo ang nalamita sa contact tracing.
Sa subong, nagakahangawa ang natungdan bangud nga indi makatrabaho ang tanan nga barangay officials ilabi pa nga ginpaidalom sa surgical lockdown ang ila lugar.
