ILOILO CITY – Magasunod ang Simbahang Katolika sa mandu sang Inter-Agency Task Force nga ipasirado ang mga patyo humalin Oktubre 29 tubtub Nobyembre 4.
Ini ang kasunod sang pagpaguwa sang Inter-Agency Task Force sang Resolution no. 72 nga nagamandu nga ipasirado ang tanan nga public kag private cemeteries, memorial parks kag columbarium agud nga indi magdagsa ang tawo sa pagsaulog sang Tigkalalag kag agud nga malimitahan ang local transmission sang COVID-19.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga wala sang problema ang pagsunod sa ginapatuman nga precautionary measures batok sa COVID-19 apang kun tani, itugyan sang Inter-Agency Task Force sa tagsa ka Local Government Unit ang pagdesisyon.
Sa pagpaathag ni Msgr. Oso, ang Local Chief Executive amo ang lubos nga nakahibalo sang matuod nga sitwasyon sang lugar kun COVID-19 ang pagahambalan.
Kun may yara sang mandu si Iloilo City Mayor Jerry Treñas nga ipasirado ang patyo sa nasambit nga mga petsa, ginpahayag ni Msgr. Oso nga ila ini nga pagasundon.
Kun sundon gid ang mandu sang Simbahan, tuman ka importante ang pagduaw sang minatay sa adlaw sang Nobyembre 2 ukon All Souls Day suno kay Msgr. Oso apang ang Simbahan ang nagahatag sang plenary indulgence para sa mga tumuluo nga magabisita sang ila minatay humalin Nobyembre 1 tubtub 8.
