ILOILO CITY – Ginatinguhaan sang Jaro Archdiocesan Social Action Center nga mahatag ang tanan nga kinahanglanon sang mga Ilonggo nga Locally Stranded Individual nga nagapabilin pa sa Ninoy Aquino International Airport matapos nga ginkansela ang ila nga flight papauli sa Iloilo.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga may yara sang direct kag indirect victims ang COVID-19 pandemic.
Suno kay Msgr. Oso ang direct victims amo ang mga nadapu-an sang virus samtang ang mga indirect victims naman amo ang mga Locally Stranded Individual, mga nadulaan sang trabaho, mga naka-angkon sang mental health issues kag iban pa nga naapektuhan sang ginapatuman nga community quarantine.
Ginpahayag ni Msgr. Oso nga daku ang iya pagpasalamat sa Bombo Radyo nga amo ang nangin palaagyan agud nga mabuligan ang mga Ilonggo nga nagapabilin sa gihapon sa Metro Manila.
Bangud nga limitado ang resources, ginpahayag sang natungdan nga ang mga Ilonggo lang anay ang mangin prayoridad nga hatagan sang hygiene kits, pagkaon, vitamins kag iban pa nga basic needs.
