ILOILO CITY – Nagpa-Bombo ang isa ka iloy matapos nga naka-angkon sang expsoure sa COVID-19 ang iya anak nga una nga nakitaan sang sintomas sang acute appendicitis kag gin-admit sa Western Visayas Medical Center.
Sa exclusive interview sang Bombo Radyo sa iloy nga nagpahinago lang sang pangalan, iya ginpahayag nga sang Setyembre 15 sang gin-admit sa hospital ang iya 16 anyos nga anak bangud sa pagsakit sang tiyan kag gin-diagnose nga may acute appendicitis.
Suno sa iloy, operahan na kun tani ang iya anak apang natukiban nga wala sang acute appendicitis ang iya anak kundi tuga lamang sang mestruation ang pagsakit sang tiyan sang pasyente.
Ginpahayag sang iloy nga gindala sa Non-COVID ward ang iya anak pagkasunod nga adlaw apang sang ulihi, ginkakibot nila nga gin-lockdown ang nasambit nga ward bangud nga may pasyente nga nagpositibo sa virus.
Sa pagpaathag sang iloy, antes gindala sa nasambit nga ward ang iya anak, na pull-out na ang COVID-19 positive rason nga wala sila sang exposure sa virus.
Ang ginareklamo pa gid sang iloy amo nga kun tani, wala na lang gindala sa nasambit nga ward ang iya anak kag sa baylo, ginpahanugutan na lang sila nga makapauli sa Tigbauan, Iloilo.
Nagakahangawa ang natungdan nga posible malatnan sang virus bangud nga sa hallway na lang sila nagapwesto kag madamo ang naga-agi.
Sa pagpaathag naman ni Richard Saltin, designated spokesperson kag Disaster Risk Reduction and Management in Health Manager sa nasambit nga hospital, indi pa mahimo nga makapauli ang pasyente bangud nga gin-lockdown ang Non-COVID ward.
Suno kay Saltin, antes pahanugutan nga magpaidalom sa home quarantine, hulaton anay ang COVID-19 test sang pasyente agud nga makasigurado kag agud nga malimitahan ang risgo nga maglapta ang virus.
Ginpahayag ni Saltin nga antes gin-admit ang pasyente, ginpaathagan na ang iloy kun ano ang sitwasyon sa sulod sang hospital.
Bangud nga may pasyente sa Non-COVID ward nga nagpositibo sa virus, gin-lockdown ang nasambit nga ward kag wala ginapahanugutan nga makaguwa ang mga pasyente lakip na ang mga bantay agud nga masigurado nga indi maglapta ang virus.
Ang mga pasyente nga yara sa nasambit nga ward ang kinahanglan nga ipaidalom sa RT-PCR test.
