MANILA – Halos ka tunga sang 62 ka mga registered Philippine Offshore Gaming Operators (POGOs) sa pungsod nga may kasubong nga address sa ila service providers ang natukiban nga nagalapas sa requirement sang gobyerno.
Suno sa Anti-Money Laundering Council, naglab-ot sa 26 ka POGO ang may pareho nga address sa ila service providers.
Sa pagpaathag ni Anti-Money Laundering Council Secretariat Executive Director Mel Georgie Racela, indi mahimo nga magpareho ang POGO licensee kag ang service provider.
Suno kay Racela, ang requirement sang Philippine Amusement and Gaming Corporation amo nga ang Philippine service provider amo ang dapat nga i-hire sang POGO agud nga ang ekonomiya sang pungsod ang makabenepisyo.
Ginpahayag ni Racela nga sa subong, padayon ang information gathering sang Anti-Money Laundering Council may kaangtanan sa tag-iya sang mga erring licensed POGOs.
Mahimo nga sa masunod nga semana, mahatagan naman sang kopya ang Senado.
Apisar sang COVID-19 pandemic, ang POGO industry lang ang ginpahanugutan nga makapadayon sa pagnegosyo sa kondisyon nga ila bayaran ang unpaid taxes sa Bureau of Internal Revenue kag sundon ang strict health protocols.
Gintawag naman ini sang mga senador nga “good riddance” bangud nga ang POGO ang gina-angot sa pagtaas sang kriminalidad kag prostitusyon sa pungsod.
