Indi bastante ang P2.5 billion nga alokasyon para sa pagbakal sang Coronavirus Disease 2019 (COVID-19) vaccine sa idalom sang national budget.
Suno kay Department of Health Undersecretary Mario Villaverde, kulang ang pondo kun basehan ang pahayag ni Presidente Rodrigo Duterte nga 20 million ang target nga mabakunahan rason nga nagduso ini nga madugangan sang P10.4 billion agud nga ang pondo para sa bakuna ang mangin P12.9 billion.
Nagapangayo naman sang paathag si House Deputy Minority Leader Carlos Zarate sa kulang sa listahan sang budget items para sa COVID-19 response.
Ginkwestyon man ni Zarate kun paano nangin prayoridad ang Department of Healyh kun nag hingyo ini sang P10 billion budget para sa Personal Protective Equipment (PPE) apang P2.7 billion lamang ang ginhatag.
Pahayag ni Villaverde, ang P5.2 billion sang P6.9 billion nga Foreign Assisted Projects sa idalom sang unprogrammed fund sang proposed 2021 budget ang para sa COVID-19 response kag may pondo nga magahalin sa loan gikan sa World Bank kag Asian Development Bank.
