ILOILO CITY- Ginrekomendar ni Iloilo Governor Arthur Defensor Jr. ang pagtalana sang quota sa numero sang mga nagapauli nga mga Returning Overseas Filipinos (ROFs) sa probinsya.
Sa interview sang Bombo Radyo kay Governor Defensor, iya ginpahayag nga may direktiba na ini sa mga department heads sa probinsya nga istoryahon ang Overseas Workers Welfare Administration, Office of Civil Defense kag Regional Task Force nga magbutang sang limit sa numero sang mga ROFs nga nagapauli.
Suno kay Defensor, ini agud nga madumala sang maayo kag indi magginutok ang mga quarantine facilities.
Nahibaluan nga may ginatalana nga quota sa ginapapauli nga mga Locally Stranded Individuals apang wala naman sang quota ang Returning Overseas Filipinos (ROFs).
