Wala na sang kabuhi sang nasapwan ang lima ka tuig nga bata nga babaye nga gin-anod sang suba kaupod ang iya utod sa Barangay Talongadian, Sta. Barbara, Iloilo.
Matandaan nga ang mag utod amo sanday Mary Grace Sobreviva, lima ka tuig kag Modesto Sobreviva, 12 anyos, residente sang Barangay San Jose, San Miguel.
Sa interview sang Bombo Radyo kay PMaj. Raymond Celoso, hepe sang Sta. Barbara Municipal Police Station, iya ginpahayag nga ginabanta 23 ka oras man antes nakit-an ang bata sa suba nga sakop sang Barangay Pal-Agon sa nasambit nga banwa.
Suno kay Celoso, ang mga volunteer rescue group kag mountain tigers ang nakakita mismo sa bata nga babaye nga wala na sang kabuhi.
Tubtob subong wala pa sa gihapon makit-an ang 12 anyos nga utod man sang biktima.
