Mabudlay para sa mga driver sang depampasahero nga jeep nga ipatuman ang one-meter physical distancing sa mga pasahero.
Sa interview sang Bombo Radyo kay Raymundo Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA), iya ginpahayag nga kun ipatuman sang mga driver ang one-meter physical distancing sa sulod sang jeep, mahimo nga tatlo na lang ukon apat nga mga pasahero ang maakomodar.
Suno kay Parcon, maapektuhan mismo ang kita sang mga driver kun hugot nga ipatuman ang nasambit nga pagsulundan.
May mga operators man nga nagpahayag nga kun apat ukon tatlo man lang nga pasahero ang maakomodar, mas maayo nga i-pull out na lang nila ang salakyan kag indi na magbyahe pa.
Nalipay na kuntani ang transport group nga buhinan ang physical distancing sa mga pampubliko nga salakyan agud amat-amat na balik sa normal ang byahe.
Apang liwat nga nag uy-uy ang ila abaga bangud sa ipatuman nga 1 meter physical distancing.
Kun madayon ang amo nga pagsulundan, magahingyo ang ICLAJODA nga dugangan ang plete ukon himuon nga P15.
