ILOILO CITY – Mas makapaayo nga dal-on gilayon sa veterinarian ang isa ka sapat nga makitaan sang sintomas sang balatian.
Sa exclusive interview sang Bombo Radyo kay Dr. Paolo Leandicho, veterinarian kag co-owner sang Family Vet Clinic and Supplies, iya ginpahayag nga kun ang isa ka tawo ang nagabalatian, ang mga sapat ang may mga ginabatyag man sa ila lawas.
Suno kay Dr. Leandicho, kalabanan sa mga balatian nga mahimo mag-igo sa mga sapat amo ang allergy, scabies, dental problem, Canine parvovirus, kag iban pa tuga sang Staphylococcus aureus nga bacteria.
Ginpahayag sang beterenaryo nga may mga balatian kaangay sang allergies nga nagakinahanglan sang lifetime nga pagbulong.
Nagpaandam man si Dr. Leandicho sa mga balatian sang mga sapat nga mahimo maglaton sa tawo kaangay sang scabies rason nga nagakadapat nga magpadulong sa beterenaryo.
Gindayaw man sang natungdan ang mga Ilonggo nga pet owners bangud apisar may pandemya, wala ang mga ini nagapabaya sa ila mga hinuptanan nga kasapatan.
Nagpanugyan man ang beterenaryo nga indi pagkalipatan nga ipa-rabbies vaccine shot ang nihuptanan ilabi na ang ido isa ka beses kada tuig.
Indi basta-basta ang pagpatukod sang isa ka negosyo kaangay na lang sang veterinary clinic.
Sa exclusive interview sang Bombo Radyo kay Danya Jacomille Leandicho, tiayon ni Dr. Leandicho, kag manager sang Family Vet Clinic and Supplies, iya ginpahayag nga nagakadapat nga may yara ka sang ‘heart and passion’ sa negosyo.
Bilang graduate sang kurso nga Bachelor of Science in Management, Major in Legal Management, nakabulig man ini sa pagpadalagan sang negosyo.
Sa bahin ni Danya, bangud beterenaryo ang iya bana, naisipan nila nga magtukod sang negosyo nga veterinary clinic kag supplies diri sa Syudad sang Iloilo.
Ginadayaw man sang natungdan ang iya bana bangud humalin sang bata pa siya, mahilig na ini sa kasapatan rason nga nagkuha siya sang kurso nga Veterinary medicine.
Bilang isa man ka pet lover, mas nangin mahapos para sa ila mga mag-asawa ang pagpadalagan sang ila negosyo.
Sa subong, halos kumpleto na ang ila mga equipment nga ginalakipan sang Ultrasound Machine, Complete blood count (CBC) machine, Blood Chemistry Analyzer , Microscope kag may yara man sila sang Oxygen Tank.
May yara naman sila 2 ka mga medical technologists kag mga staff rason nga madasig ang ila serbisyo.
