THAILAND – Dako ang ginahatag nga respeto sa mga manunudlo sa pungsod Thailand.
Sa exclusive interview sang Bombo Radyo kay Mary Ceres Porto Brunia, tumandok sang Brgy. Inaca, Cabatuan, Iloilo apang nagatrabaho na bilang manunudlo sa Lampang, Thailand, iya ginpahayag nga 25 ka tuig na siya nga nagatudlo sa nasambit nga pungsod.
Suno kay Porto, duha ka tuig siya nga nagtudlo sa De Paul College sa Iloilo kag sang gintanyagan sang rector nga magtudlo sa Thailand, iya ini nga ginbaton sa kondisyon nga isa lang ka tuig siya nga magatudlo.
Apang sa ulihi, nauyunan naman ni Porto ang pangabuhi kag trabaho rason nga nagdugay na siya sa nasambit nga pungsod.
Sang una suno kay Porto, madamo ang nagalikaw sa iya bangud indi siya makahibalo sang Thai nga amo ang lengwahe sa nasambit nga pungsod.
Ini man ang nagtulod sa iya agud magtuon sang Thai kag sa ulihi, naintindihan niya nga ginalikawan siya sang mga locals sa lugar bangud nabudlayan sila nga maghambal sang English.
Sa subong nga may pandemya, ginpahayag ni Porto nga maayo man ang ila sitwasyon sa Thailand kag sa pagkamatuod, mas nagakabalaka siya sa iya pamilya sa Pilipinas bangud sa nagataas nga kaso sang Coronavirus disease 2019 (COVID-19).
