ISRAEL – Ginsaulog sang mga Israeli ang Shabbat ukon day of rest sang Judaism kag Rosh Hashanah ukon New Year paagi sa pagpabilin sa ila tagsa ka mga balay.
Ini matapos nga ginpatuman ang 3-week lockdown bangud sa pagtaas sang na record nga COVID-19 cases.
Suno kay Bombo International Correspondent Ann Julie Siasat, simple lamang ang pagsaulog sang Holidays sa Israel apang ang kinalain sa subong amo nga ang New Year nga ginsaulog sang Setyembre 18-20, ang natuon gid sa lockdown.
Ginpahayag ni Siasat nga ang iban sa mga kompaniya sa Israel ang nagsirado samtang may yara naman sang bukas.
Istrikto nga ginapatuman ang minimum health protocol kasubong sang pagsuksok sang face mask kag pagpatuman sang physical distancing ilabi na sa pagsulod sa mga commercial establishment kun sa diin ang iban sa mga kalan-an ang nagatanyag na lang sang delivery services.
Nagalab-ot sa 1,000 shekels ukon kapin sa P15,000 ang multa sa tion nga madakpan nga wala nagasuksok sang face mask sa mga pampubliko nga lugar samtang sirado sa gihapon ang kalabanan sa mga tourist destination.
Apisar sang ginapatuman nga restrictions, ginpahayag sang natungdan nga padayon sa gihapon ang rocket launch sang Palestine apang ini ang na-intercept man sang Israel.
Kasubong nga nagahawid pa ang Palestine sa pagpunterya sa Jerusalem bangud nga ini ang designated capital sang nasambit nga estado apisar nga ang administrative center amo ang Ramallah.
Sa subong, ang Israel ang may 183,602 ka COVID-19 cases, 132,449 ang naka-recover samtang 1,226 naman ang ginbawi-an sang kabuhi.
