MIAGAO, ILOILO – Wala sang patigayunon nga aktibidad kadungan sang pagsaulog sang kapiyestahan sa banwa sang Miagao, Iloilo sa Setyembre 22.
Sa interview sang Bombo Radyo kay Mayor Macario Napulan, iya ginpahayag nga sa bespiras kag sa adlaw mismo sang fiesta, misa lang ang patigayunon.
Suno kay Napulan, limitado lamang sa magpamilya ang handa kag gina-engganyo nga indi anay magbaton sang mga bisita.
Ginpahayag ni Napulan nga ginasunod gid ang guidelines kag protocol nga ginamandu sang Inter-Agency Task Force agud nga matapna ang paglapta sang COVID-19.
Sa banwa sang Miagao, ginpahayag ni Napulan nga kontrolado ang local transmission kag sa subong, tatlo ang active cases nga ginalakipan sang duha ka Returning Overseas Filipinos kag isa ka 80 anyos nga babayi.
Ang duha ka Returning Overseas Filipinos ang yara sa quarantine facility kag nagapabilin nga asymptomatic samtang admitted naman sa hospital ang COVID-19 positive nga tigulang.
Gina-assess sang COVID-19 team sang banwa kun bala, mahimo nga pasugtan ang COVID-19 positive nga makapaidalom sa home quarantine.
