ILOILO CITY – Mahimo nga magpangatubang sang kaso nga Trespass to Dwelling ang sin-o man nga magsulong sa sulod sang isa ka pribado nga propidad nga wala sang pahanugot sang tag-iya.
Ini ang sabat sang Bombo abogado nga si Atty. Joenar Pueblo may kaangtanan sa problema sang tagreklamo nga nagpahinago lang sa pangalan nga Michael.
Una diri, ginpahayag sa Bombo Radyo sang tagreklamo nga may yara siya sang kasilingan nga masami nga nagapahilabot sa iya gamit paagi sa pagsipa kag pagtindak sini.
Suno kay Michael, wala siya sang ideya kun ano ang motibo sang iya kasilingan tubtub nga sang ulihi, may yara sang komprontasyon nga natabo kag nagresulta sa pagsinumbaganay.
Ginpahayag ni Michael nga nagsulod sa ila balay ang nasambit nga kasilingan kag ginkompronta ang iya tiayon rason nga iya ini nga ginsumbag kag nag-apin man ang duha niya ka mga anak nga lunsay minor de edad.
Indi lang madetalye ni Michael kun ano nga mgatinaga ang ginbuy-an sang kasilingan sa iya tiyaon nga amo ang nanugid sa iloy sang ginareklamo tuhoy sa ginahimo sa ila.
Sa pagpaathag naman ni Atty. Pueblo, mahimo nga makasuhan sang Trespass to Dwelling ang kasilingan bangud sa pagsulong sa sulod sang isa ka pribado nga balay nga wala sang pahanugot sang tag-iya.
Mahimo man nga ikaso ang Qualified Trespass to Dwelling, Grave Threat ukon Oral Defamation kun mapamatud-an nga may yara sang malain nga tinaga kasubong sang pamahog nga ginbuy-an ang ginareklamo.
Tuhoy naman sa kinagamo nga natabo sa tunga sang tagreklamo kag sang ginareklamo, ginpahayag ni Atty. Pueblo nga wala gid sang salabton ang tagreklamo kun self defense ukon yara sa sulod sang balay ukon propidad natabo ang inaway.
Kun yara naman sa guwa sang balay ukon sa guwa sang propidad natabo ang inaway, mahimo pa nga mabalikan sang kaso ang tagreklamo.
Agud nga indi na maglab-ot sa pagkinasuhay, ginpanugyan sang abogado nga daku ang responsibilidad sang barangay council sa paghitso sang gamo sa tunga sang magtimbang nga bahin.
