ILOILO CITY – Nag-umpisa na ang monitoring sang Iloilo City Police Office may kaangtanan sa ginapahayag mga makaduluda nga mga indibidwal nga nagapanilag sa mga jewelry store sa syudad sang Iloilo.
Ini matapos nga nakalab-ot sa igtalupangod sang otoridad ang nasambit nga impormasyon kun sa diin ginapahayag nga una nga namutikan ang ginakabig suspicious looking individuals sa dalan Guanco sa City Proper.
Indi lang makahatag sang detalye si Police Lieutenant Colonel Alexis Relado, Deputy City Director for Administration sang Iloilo City Police Office, tuhoy sa ginapatigayon nga intelligence monitoring.
Sa subong, may yara na sang deployment sang beat patrols agud nga magbantay sa mga lugar nga may yara sang citings sang makaduluda nga indibidwal.
May kaangtanan diri, ginpahayag ni Iloilo City Mayor Jerry Treñas nga may nagpalab-ot sa iya sang reklamo tuhoy sa makaduluda nga mga indibidwal nga nagabalik-balik sa guwa sang mga jewelry store sa dalan Guanco.
Bangud sini, ginpahayag ni Treñas nga may yara na sang mga nagabantay nga pulis sa nasambit nga area agud mapasiguro nga wala sang pagpangawat nga matabo indi lamang sa mga jewelry store kundi lakip na sa mga financial istitution.
Indi mahinago suno sa alkalde nga sa subong nga may pandemya, tuman ka pigado sang pagpangabuhi kag ini ang nagatulod sa iban nga maghimo sang krimen.
