ILOILO CITY – Ginkumpirma ni Public Safety and Transportation Management Office Head Jeck Conlu nga may yara sang COVID-19 cases sa Brgy. San Vicente, Jaro, Iloilo City.
Ini ang kasunod sang report tuhoy sa ginapahayag pagtago sa COVID-19 cases agud nga indi pag-ipaidalom sa lockdown ang nasambit nga lugar.
Sa interview sang Bombo Radyo kay Conlu, iya ginpahayag nga santo sa impormasyon nga iya nabaton, tatlo ang COVID-19 cases sa nasambit nga lugar kun sa diin ang mga pasyente ang lunsay maghimata.
Suno kay Conlu, lakip sa mga nagpositibo sa virus amo ang iloy, anak kag apo apang wala pa siya sang tul-id nga detalye tuhoy sa nasambit nga mga pasyente.
Ginpahayag ni Conlu nga importante nga mahibalu-an gilayon sang COVID-19 team nga may yara sang nagpositibo sa isa ka lugar agud nga makapatigayon gilayon sang lockdown ukon mapaidalom sa COVID-19 test ang mga identified close contacts sang pasyente.
Sa sini nga paagi suno kay Conlu, mapunggan ang local transmission sang virus ilabi pa nga sa syudad sang Iloilo, padayon nga nagataas ang numero sang COVID-19 cases.
May kaangtanan naman sa pagpaidalom sa 13 ka mga barangay sa 5 ka adlaw nga total lockdown epektibo 6:00 sa kasisidmon, Setyembre 22, ginpahayag sang natungdan nga nahandaan na ini sang Iloilo City Government.
Indi mahinago suno kay Conlu nga may yara sang gap sa pagpatuman sang lockdown apang lauman suno sa iya nga ini ang normal lamang kag gilayon nga masolusyunan.
Apisar nga mabudlay ang sitwasyon, ginpahayag ni Conlu nga kinahanglan nga magpatuman sang lockdown bilang preventive measure.
