ILOILO – Kinahanglan sang insakto nga regulasyon kag may proseso ang pagbaligya sang mga baboy sa mga merkado sa kabanwahanan sa probinsya sang Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga makig-angot siya sa mga alkalde sa probinsya agud nga mabutang sa husto nga lugar ang mga nagabaligya sang baboy kag indi sa guwa sang merkado.
Suno kay Defensor, nag damo man lang ang mga nagabaligya sa dalan sang nag umpisa ang enhanced community quarantine bangud madamo ang nadulaan sang trabaho kag isa ini ang pamaagi agud nga makakwarta ang tawo.
Mahimo nga mas ginapili sang tawo ang pagbakal sa guwa sa baylo nga magsulod pa sa merkado bangud indi ini maggutok kag madasig lang ang transaksyon.
Apang dugang sang gobernador, kinahanglan ini nga butangan sang limitasyon agud nga mabakal man sang safe ang ginabaligya sang tawo pinaagi sa pagsunod sang health and sanitation code sang gobyerno.
